ANTIBIOTIC RESISTANCE
-Judy Lalrengpuii
M.S.(Pharm) Pharmaceutics
Tunlaiin kan ramah Antibiotics damdawi hi kan hmang hluar em em a, chutih rualin Antibiotic Resistance pawh a pung ve zel a ni. Hemi avang hian Antibiotics hman dan dik kan hriat a, Antibiotic Resistance laka mipuite kan inven fimkhur hi a tul takzet a ni. Chuti anih loh chuan tuna natna enkawl leh tihdam nana tangkai tak kan Antibiotics te hi hman thlak lohah kan siam thei a ni.
Antibiotics chu engnge ni?
Antibiotics chu natna hrik (Bacteria) thattu leh inthlahpung tur tithuanawptu damdawi a ni a, natna hrik avanga mihring leh ran natna chi hrang hrang enkawl leh tihdamna tura damdawi duan leh siam a ni. Antibiotics hi chi hrang hrang a awm a, entirna thenkhat te chu: Amoxicillin, Azithromycin, Clarithromycin, Penicillin, Tetracycline, Doxycycline, Cefixime, Norfloxacin, etc., te hi a ni. Antibiotics te hi a damdawi nihphung a zirin a hmanna leh hman dan tur a danglam ve zel bawk.
Antibiotic Resistance chu engnge a nih le?
Antibiotics damdawiin natna hrik a do let emaw thah theihna a hloh hi Antibiotic Resistance chu a ni. Heihi natna hrik insiam danglam avanga lo awm a ni a, natna hrik thahna tura hman ber Antibiotics damdawi chu ngaiah lo nei (resist) in, mihringa natna thlentu hrikte chu a thah nan a hman theih ta lo a. Hei vang hian mihringa natna hrikin a thlen natna (diseases) te chu tihdam a lo harsa ta thin a ni.
Antibiotic Resistance chu engvanga lo awm nge a nih?
Antibiotic Resistance lo awm chhan lian tak pakhat chu Antibiotics hman fimkhur tawk loh vang a ni. Doctor-te leh damdawi lama mithiamte râwn hmasa lova mahni thua Antibiotics inchawh (self-medication) avang te, tlâng hrileng satliaha ei mai te, ei hun bi diktaka ei loh leh ei hun bituk ei thleng lova mahni thua tihtawp mai te hian natna hrikte hi that kim lovin, Antibiotics damdawi chu ngaia neiin (resist) a lo insiam danglam a, kan damdawi ei chu hnathawk theilo turin a lo do let thiam ta thin a ni.
Engtinnge Antibiotic Resistance lak atang kan him theih ang?
– Mipuite hian fimkhur takin Antibiotics damdawi hi kan hmang tur a ni a. Doctor-te leh damdawi lama mithiamte chawh ni lova mahni thu leh remhriatnaa inchawh ringawt hi kan tih miah loh tur a ni. Tin, midangin an ngeih avanga ngeih ve tur a inngaih ngawt hi thil thalo tak a ni bawk.
– Tlang hrileng tam zawk (eg: hritlang satliah) te hi Virus hrikin a thlen a ni a, hengah te hian Antibiotics hman hi dampuina a ni lova. Chuvangin Antibiotics damdawite hi hman ringawt loh tur.
– Antibiotics damdawi hi a ei hun dik tak leh hunbi tuk ang thlapa ei tur a ni. Kan natna a dam tawha inhriat avang ringawta mahni thua tihtawp hi Antibiotic Resistance thlentu langsar tak a ni.
– Tin, damdawi zuarte mawhphurhna pawh a sang hle. Doctor prescription tellovin Antibiotics-te hi hralh mai mai loh tur a ni.
– Ran enkawl nana Antibiotics hman hi fimkhur a ngai hle bawk. A chhan chu ransa kan ei atang hian mihring taksaah Antibiotic Resistance a awm phah thei a ni.
Heng kan tarlan tak atang hian Antibiotics kan hman fimkhur loh leh a nih dan tur anga hman a nih loh pawizia kan hre thei awm e. Chuvangin, Antibiotics natna enkawl nana tangkai leh hlu tak takte hi Doctor leh damdawi lama mithiamten hmanna tur an tih leh hman dan tur an tih ang takin i eiin i hmang ang u.
